Weit Dir ou go Reise hüür?

Oder chunnts nech öppe z’tüür?

Wei mir e Fabrig go besichtige,

villicht git’s es Gaffi und es Gipfeli.

Mir tüe üs aui ufenes Reisli freue,

hoffentlich wei si deheime nid grad höiie.

Wei mir ächt a Bodesee?

Dä heimer ou scho lang nümme gse.

Oder wei mer ufene Hoger ue?

Ou nei, ig ha jo keni Wanderschue.

E, mou, Du hesch rächt

e Fahrt is Blaue wär ou nid schlächt.

Oder wei mir das em Vorstang überlo,

wo är hüür mit üs wot häre go?

Nei, das muess jetz planet si

de wüssemer ou wo hi.

Jä chunnt Dir öppis z’inn?

De gieng das Reisli plane ring.

E Vorschlag hätt ig scho gha,

dä chunnt dänk glich nid bi aune a.

I has scho dänkt, das sig vil zwiit

s’wär ömu ou no i der Schwiiz.

U de die Reis vo färn?

Die wär planet gsi nach Bärn.

Wei mer de scho am Morge go

und d’ Manne am Schiksal überlo?

Chöit dänke, z’ Mittag das längt no lang.

Süsch wird’s doch dene Manne bang.

So tüet Öich jetz entscheide,

mir wei de no hüür go Reise.

Jä, und jetz wohi?

He, ane Ort, wo mir no nie si gsi!